البقرة وقعت فى الساقيه

نداء إلى دولتنا الحبيبه (مصــــر)..الجاموسه وقعت فى الساقيه ولازم نطلّعها .. يا نقتلها ونخلص منها

..

إنجزى يابلد

الناس أبتدت تزهق .. ولكل صبر نهايه .. ومش عارف ليه مسيطر على تفكيرى مشهد فيلم الأرض ليوسف شاهين

لما البقره وقعت فى الساقيه

الناس هنا فى المشهد كانت مصيبتهم مصيبتين .. أو طامه كبرى باللغه المقعره

فأول مصيبه هو أن بما أن البقره وقعت فى الساقيه .. فده هيمنع الساقيه من العمل بإنتظام

وبكده المياه مش هتترفع عشان تروى أراضيهم

أما الفريق الآخر فكان محتاس فى مين اللى هيشيل تمن الجاموسه لو ماتت؟؟

وشوية السنيده عارفين أنهم هيتمخمضوا وبنزلوا فى الطين عشان

همه دائماً الشريحه اللى بيتطلب منها الطلبات اللى

فيها فرهده .. بتوع الفحت و الردم يعنى 😀

ماحدش فكيك فيكم فكر فى موقف الجاموسه نفسها؟؟

مش إحتمال تكون الجاموسه مبسوطه ومتكيفه من القعده تحت

وبتدعى ربنا أنهم يفشلوا فى إخراجها من الساقية

عشان هى – أى الجاموسه- متيقنه من داخلها

أنهم ناس طيبين .. لو ماعرفوش يخرجوها .. هيسيبوها تعيش فى الساقيه

وينزلوا لها أكلها كل يوم

وبكده تحولت الجاموسه من حيوان بيسعى ويلف حوالين نفسه طول النهارمقابل حزمة برسيم

إلى إقامه خمس نجوم .. بير فيه ميه تكفيها .. وناس بتدى لها أكل كل يوم عشان هى صعبانه عليهم

وده بالفعل اللى حصل

الحكومه بتاعتنا فشلت بجد أكتر من كل تشكيل وزارى سابق

ووقعت وقعة الجاموسه فى الفيلم

بس جاموستنا برشطت وقامت مأنتخه وعجبتها القعده تحت

والطالمه الكبرى -تانى- أن شعبنا العزيز المهاود

بالغ فى عطفه على الجاموسه .. وفرش لها الساقيه خمس نجوم

وبيخدمها خدمه فندقيه

مش عارف هل النوت ده ليه علاقه بأن الحكومه بتقطع الكهرباء عن الناس رغم أنها

خدمه واجبه عليها كحكومه وكشركه أن يتعاملوا معنا كعملاء

الكاستمر سيبرفس والعياذ بالله

أو بيقطعوا الميه فى أى وقت من غير أى مراعاة لظروف وأحتياجات الناس

أو أننا هنستورد الغاز اللى أحنا مصدرينه لأسرائيل عشان نعوض فرق الطاقه

ماعلينا

بالنسبه للجاموسه؟؟

مبسوطه من الخدمه ولا ليكى طلبات تانيه؟؟